الجزء السابع عشر: الزبدة، بسوالف صافية شافية

الكاتبة/زينب مهدي - كريمة الشهيد ابو زينب الخالصي

أگول للمقاوم: ليش اختاريت هذا الخط؟ يگول: لأن كل مصايبنا من أمريكا و… أگول للوطني: إنت ليش اختاريت هذا الخط؟ لأن أريد أنقذ الوطن من ذيول إيران و… زين، ليش؟ شلون؟ شصار؟ منو گال؟ تره إذا نختار مواقفنا بدون فهم ووعي، نخسر المعركة ونبقى تجيبنا روجة وتودينا روجة.

بسلسلة الهيمنة الأمريكية حاولت أشرح الواقع الحالي، وما تكلمت عن شي صار وخلص. وكلها مستندة إلى وثائق رسمية وأدلة قانونية (تگدر تبحث عنها بالگوگل). جبناها أول شي على فلوس نفطنا كلها تروح للبنك الفيدرالي بأمريكا، وهي تدزلنا شوكت وشگد متريد، وأي شي ما عجبها تقطع علينا فلوسنا.

وثاني شي، خلت قوانين للمصارف سمتها "معايير الامتثال"، حتى أي واحد ما عجبها تگول: هذا ما التزم بالقوانين، فراح أعاقبه. مرات صدگ تلگي عنده فساد وغسيل أموال، ومرات لا، بس مجرد خالف الأوامر الأمريكية، حتى يختلط عدنا الحابل بالنابل وتتيه علينا. مثل ما هسه ديسويها علي الزيدي تحت اسم حملة الفجر لمكافحة الفساد، هم خبصها علينا وتهنا بيها، يعني نفس الإسلوب الأمريكي بالضبط.

أنوب، راح سوّى صفقة القرن وخلى كل العراق بيد شركات أمريكية حصراً.

"بس تره أمريكا تريد تحتكر استثمارات العراق، هم علمود الربح وهم علمود تسيطر أكثر. بس عراقي واحد يتمرد عليها، تسحب مهندسيها وتقطع قطع الغيار وتخلينا بظلمة، هندس، وحالنا حال الضيم". إي، شكو بيها؟ خو لحد يتمرد، وخلي أمريكا تشتغل ونصير مثل الخليج. خلي نقبل مؤخرة ترامب، المهم نعيش مثل العالم والناس.

إي، هم صدگ، كافي شعارات. إحنا بس نريد أبسط حقوقنا الأساسية، بس هم شفنا نفسها الشركات الأمريكية من ٢٠٠٣ ولحد الآن شسوت وشصخمت بالعراق.

زين، خلي ننوع بالعلاقات، مو بس وي أمريكا. خل نشوف الصين مثلاً. مو سواها عادل عبد المهدي "الاتفاقية الصينية وعقد شركة سيمنز وفتح طريق آلبوكمال"، بس أمريكا قطعت فلوسنا علينا واستغلت ثورة شبابنا وفرضت علينا ضغوطات اقتصادية وسياسية هائلة إلى أن استقال الرجال، وكلشي رجع بمكانه، وإجه الكاظمي والسوداني والزيدي عرفوا الدرس كلش زين… الكرسي بيد أمريكا، فإذا أريد الفلوس والسلطة لازم أرضي أمريكا وبس.

"مو أمريكا دتقتل أبنائنا وقادتنا ودتعتدي على أراضينا". ؛ إي، ميخالف، هذا من "الماضي"، وآني شاب ووسيم والدنيا كلها گدامي، وهسه أريد حصر السلاح بيدي حتى أطمئن محد يضوج أمريكا.

"مو أمريكا وأذنابها مثل الكويت والسعودية بعدهم ديقتلون بينا ويخترقون أرضنا وسمائنا، وفوگها إنترنتنا بيدها، وكل بياناتنا ومعلوماتنا مكشوفة گدامها، ومسيطرة علينا بالريموت كونترول، وبضغطة زر تنهينا وتنهي العراق".

إي، مو عرضوا عليكم دنيا هارون الرشيد ورفضتوها… غير إنتو متعرفون شنو يعني المال والمقام.

تمام، لعد أگعد وإستچن ولا تهوس بالسيادة وإنت مربوط بحبل أمريكا ودويلات تابعة إلها تهتك سيادتنا وتقتل أبنائنا، وإنت مسويها فلم: "مرة زعلت، بعد ما أجيكم للسعودية"، وإنت تدز وزير خارجيتك وتستقبل رئيس جهاز الاستخبارات السعودي، وشمرتها براس غيرك وطلعت منها، ومرة عود ترزل وزيرك گدام الكاميرات حتى ترامب يگول عليك "قائد عظيم".

عرفنا بسلسلة الهيمنة الأمريكية بأن بالحرب الجيل الخامس، وبخطوات دقيقة من السيطرة الاقتصادية والسيبرانية والإعلامية، وبالذكاء الاصطناعي، شلون يغسلون دماغنا، واقترحنا الحلول اللي ممكن تنفيذها فوراً إذا تجي حكومة شريفة وشجاعة، لأن إحنا عراقيين، ويبقى العز والكرامة يجري بدمنا.

لكن هم يبقى السؤال: ليش؟ ليش أمريكا متسوينا مثل الخليج؟ لأن حكومتنا شيعية؟ زين، ليش تعادي المحور الشيعي؟ هل لأن غالبية المقاومة منها؟ لكن مو المقاومة ردة فعل على الاستعباد الأمريكي؟ زين، شنو سبب الفعل الرئيسي والعداوة الأصلية؟

الجواب صادم، وسنناقشه في الأجزاء القادمة.